അനക്സ് തോമസ് | ആലപ്പുഴ
മാന്നാർ: പച്ചക്കറി കൃഷിയിൽ സ്വയം പര്യാപ്തത നേടുവാൻ കുടുംബശ്രീ വഴി കേരള സർക്കാർ നടപ്പിലാക്കിയ "അഗ്രി ന്യൂട്രി ഗാർഡൻ " പദ്ധതിയിൽ മികവാർന്ന പ്രവർത്തനം കാഴ്ചവെച്ച കുടുംബശ്രീയ്ക്ക് ക്യാഷ് അവാർഡ് നൽകി വാർഡ്മെംബർ മാതൃകയായി. മാന്നാർ ഗ്രാമപഞ്ചായത്ത് ആറാം വാർഡ് മെംബറും ഗ്രാമപഞ്ചായത്ത് ക്ഷേമകാര്യ സ്റ്റാന്റിംഗ്കമ്മിറ്റി ചെയർമാൻ കൂടിയായ സലിം പടിപ്പുരയ്ക്കൽ ആണ് തന്റെ വാർഡിൽ മികച്ച രീതിയിൽ കൃഷി ചെയ്ത് വിളവെടുത്ത ഉദയം കുടുംബശ്രീയ്ക്ക് ക്യാഷ് അവാർഡ് നൽകിയത്. കുടുംബശ്രീയുടെ എ.ഡി.എസ് വാർഷികാഘോഷത്തിൽ വെച്ച് ക്യാഷ് അവാർഡ് സമ്മാനിച്ചു.
മാന്നാർ ഗ്രാമപഞ്ചായത്ത് പ്രസിഡന്റ് ടി.വി രത്നകുമാരി കുടുംബശ്രീ എ.ഡി.എസ് വാർഷികാഘോഷം ഉദ്ഘാടനം ചെയ്തു. വൈസ് പ്രസിഡന്റ് സുനിൽ ശ്രദ്ധേയം, വികസനകാര്യ സ്റ്റാന്റിംഗ്കമ്മിറ്റി ചെയർപേഴ്സൺ ശാലിനി രഘുനാഥ്, ഗ്രാമപഞ്ചായത്തംഗങ്ങളായ സുനിത എബ്രഹാം, സുജാത മനോഹരൻ, വി.ആർ. ശിവപ്രസാദ്, അനീഷ് മണ്ണാരേത്ത്, പുഷ്പലത, സി.ഡി.എസ് ചെയർപേഴ്സൺ ഗീതാ ഹരിദാസ്, വൈസ് ചെയർ പേഴ്സൺ സുശീലാ സോമരാജൻ, കമ്മ്യൂണിറ്റി കൗൺസിലർ പ്രജിത, ശെൽവി ഗണേശൻ, സുജാ, സാവിത്രിയമ്മാൾ സി.ഡി.എസ് അംഗങ്ങൾ തുടങ്ങിയവർ സംസാരിച്ചു.
